لاہور ہائیکورٹ : سانحہ مری کیس کا فیصلہ سنادیا گیا

لاہور ہائیکورٹ راولپنڈی بینچ کے جسٹس چوہدری عبدالعزیز نے سانحہ مری کا محفوظ فیصلہ سنایا۔ عدالتی فیصلے میں حکم دیا گیا ہے کہ سانحے میں جن لوگوں کی شہادتیں ہوئیں ان کا معاوضہ بڑھایا جائے۔

عدالت نے مری میں سیوریج، پانی اور ویسٹ منیجمنٹ کا نظام بہتر بنانے کا حکم دیا اور غیرقانونی تعمیرات پر پابندی عائد کردی۔

عدالت نے مری میں درختوں کی کٹائی پر پابندی لگا دی اور حکم دیا کہ پارکنگ سلاٹس مری سے باہربنائے جائیں تاکہ شہرمیں رش نہ ہو۔

عدالت نے حکم دیا کہ محکمہ ہائی وے، محکمہ ڈیزاسٹرمنیجمنٹ اور ریسکیو 1122 سانحہ مری کے ذمہ داران کے خلاف انکوائری کریں، ضلعی انتظامیہ غیر قانونی تجاوزات کو ختم کرائے، مری میں ہوٹلز اور رہائشی فلیٹس کو ریگولیٹ کیا جائے۔

فیصلے میں کہا گیا ہے کہ معطل کیے جانے والے چند افسران کا سانحہ مری سے تعلق نہیں بنتا، ان کو دوبارہ سنا جائے۔

تفصیلی فیصلہ پیر7 نومبر کو جاری کیا جائے گا۔

سانحہ مری سات اور آٹھ جنوری کی درمیانی شب پیش آیا تھا جب برفانی طوفان کے باعث23 افراد جاں بحق ہوگئے تھے، جاں بحق ہونے والوں میں ایک ہی خاندان کے8 افراد بھی شامل تھے۔

سابق وزیراعلیٰ پنجاب عثمان بزدار نے سانحہ مری پر انکوائری کمیٹی تشکیل دی تھی، انکوائری کمیٹی رپورٹ کے بعد کمشنر راولپنڈی، ڈپٹی کمشنر اورسی پی او راولپنڈی سمیت 15 افسران کو معطل کیا گیا۔