ہالی ووڈ کی اداکارہ اینا مے وونگ امریکی کرنسی پر پہلی ایشیائی امریکی بن گئیں۔
امریکی ٹکسال اگلے ہفتے پچیس سینٹ کا سکہ جاری کرے گا، جس میں پہلی بار امریکی کرنسی پر ایک ایشیائی امریکی کو نمایاں کیا گیا ہے۔ اس سکے پر اداکارہ اینا مے وونگ کی تصویر کندہ ہو گی، جنہوں نے کھلے عام نسل پرستی اور دقیانوسی تصورات کے دور میں ہالی ووڈ میں کام کیا تھا۔
امریکی ٹکسال نے ایک بیان میں کہا کہ ایک چوتھائی ڈالر کےسکے پر وونگ کا پروفائل ہے جس میں ان کے دستخط والے بینگ اور لمبے ناخن نمایاں نظر آرہے ہیں۔ یہ سکہ منگل سے امریکی خواتین کوارٹرز پروگرام کے حصے کے طور پر گردش کرنا شروع کر دے گا۔
وونگ لیو سونگ، انا مے وونگ کے نام سے مشہور ہیں، وہ ایک امریکی اداکارہ تھیں، جنہیں ہالی ووڈ میں پہلی چینی-امریکی فلمی اسٹارہونے کا اعزاز حاصل تھا۔ ساتھ ہی بین الاقوامی سطح پر پہچان حاصل کرنے والی پہلی چینی-امریکی اداکارہ بھی تھیں۔ ان کے پروفیشنل کریڈٹ پر خاموش فلم، ساؤنڈ فلم، ٹیلی ویژن، اسٹیج اور ریڈیو شامل تھے۔
وونگ 1905 میں لاس اینجلس میں وونگ لیو سونگ کے نام سے پیدا ہوئیں ۔ انہوں نے 1919 میں 14 سال کی عمر میں فلم “دی ریڈ لینٹرن” میں ایکسٹرا کے طور پر کام کیا۔ اور 1922 میں “دی ٹول آف دی سی” میں پہلی مرتبہ مرکزی کردار ادا کیا۔
وہ ساٹھ سے زیادہ فلموں میں نظر آئیں جن میں ٹیکنیکلر میں بنائی گئی پہلی فلموں میں سے ایک فلم بھی شامل ہے۔ وہ 1951 میں “دی گیلری آف میڈم لیو-سونگ” میں اپنے کردار کے لیے امریکی ٹیلی ویژن شو میں پہلی ایشیائی امریکی مرکزی اداکار بن گئیں۔
اپنی کامیابی کے باوجود، وونگ کو ہالی ووڈ میں ایشیائی مخالف امتیازی سلوک اور نسل پرستی کا سامنا کرنا پڑا جہاں انہیں ٹائپ کاسٹ، کم معاوضہ اور اہم کرداروں کے لیے پاس کیا گیا، جس سے وہ فلموں میں اداکاری کے لیے یورپ جانے پر مجبور ہوئیں، اور تھیٹر میں پرفارم کرنے کے لیے لندن اور نیویارک جانے پر مجبور ہوئیں۔ وونگ کا انتقال 1961 میں ہوا۔
