پاک بحریہ میں پاکستان کے یوم آزادی کی ڈائمنڈ جوبلی تقریبات

پاکستان کے 75ویں یوم آزادی کے موقع پر بابائے قوم قائد اعظم محمد علی جناح کے مزار پر گارڈز کی تبدیلی کی پروقار تقریب منعقد ہوئی۔ یونیفارم میں ملبوس پاکستان نیول اکیڈمی کے کیڈٹس اور پاک بحریہ کے سیلرز کے چاق و چوبند دستے نے مزار قائد پر گارڈز کے فرائض سنبھالے۔

کمانڈنٹ پاکستان نیول اکیڈمی، کموڈور محمد خالد نے اس موقع پر بطور مہمان خصوصی شرکت کی ، گارڈ کا معائنہ کیا اور پاک بحریہ کے دستے کے ہمراہ بابائے قوم قائداعظم محمد علی جناح کو قومی سلام پیش کیا۔ پاک بحریہ کی جانب سے گارڈز کی تعیناتی کے بعد مہمان خصوصی نے چیف آف دی نیول اسٹاف، پاک بحریہ کے افسران اور جوانوں کی جانب سے مزار قائد پر پھولوں کی چادر چڑھائی ، فاتحہ خوانی کی اور مہمانوں کی کتاب میں اپنے تاثرات درج کرتے ہوئے بابائے قوم کو شاندار خراج عقیدت پیش کیا ۔

دن کا آغاز صوبائی دارالحکومت میں 21 توپوں کی سلامی سے ہوا جس کے بعد پاک بحریہ کی یونٹس میں قائم مساجد میں ملکی یکجہتی اور ترقی کے لیے خصوصی دعاؤں کا اہتمام کیا گیا۔ پاک بحریہ کے جہازوں اور تنصیبات میں روایتی انداز میں چراغاں کیا گیا۔

صبح کا آغاز قومی ترانے اور پاک بحریہ کے بینڈز کی شاندار پرفارمنس سے ہوا جبکہ پاک بحریہ کی یونٹس میں یوم آزادی کی متعدد تقریبات کا انعقاد کیا گیا۔