پی سی بی کا مکی آرتھر کیلئے ٹیم ڈائریکٹرکا عہدہ متعارف کروانے کا فیصلہ

پاکستان کرکٹ بورڈ نے ہیڈ کوچ کا عہدہ ختم کرکے مکی آرتھر کیلئے ٹیم ڈائریکٹر کا عہدہ متعارف کروانے کا فیصلہ کرلیا۔ غیرملکی کرکٹ ویب سائٹ کے مطابق پاکستان ٹیم ہیڈ کوچ نہیں اسسٹنٹ کوچز کے ساتھ کام کرے گی۔ مکی آرتھر بطورٹیم ڈائریکٹرتمام معاملات دیکھیں گے۔ مکی آرتھر انگلش کاؤنٹی سیزن کے دوران پاکستان ٹیم کودستیاب نہیں ہوں گے وہ ورلڈ کپ 2023اوردورہ آسٹریلیا میں ٹیم کے ساتھ ہوں گے۔ ویب سائٹ کے مطابق بورڈ مکی آرتھر کے ساتھ بیٹنگ، بولنگ اور فیلڈنگ کے اسسٹنٹ کوچز رکھے گا۔ گرانٹ بریڈبرن کو بطور فیلڈنگ اور اسسٹنٹ کوچ مقرر کئے جانے کا امکان ہے۔ مکی آرتھریکم اپریل سے ٹیم ڈائریکٹرکا عہدہ سنبھالیں گے۔ اسلام آباد یونائیٹڈ کے جنرل منیجر ریحان الحق کو ٹیم منیجر تعینات کیے جانے کا امکان ہے، جو مکی آرتھر کے چیف آف سٹاف کے طور پر کام کریں گے۔ مکی آرتھر2016 سے 2019 تک پاکستان ٹیم کے ہیڈ کوچ رہ چکے ہیں۔ ان کی کوچنگ میں پاکستان نے 2017 میں آئی سی سی چیمپیئنزٹرافی جیتی۔