وزیراطلاعات سندھ اور پاکستان پیپلزپارٹی کے رہنما شرجیل انعام میمن کا کہنا ہے کہ الیکشن کمیشن سندھ حکومت کے اختیارات میں مداخلت کا مجاز نہیں۔ نوٹیفیکیشن واپس لینا سندھ حکومت کا آئینی اختیارتھا۔ کراچی میں میڈیا سے گفتگو میں صوبائی وزیر اطلاعات کا کہنا تھا کہ عوام نے ہمیں مینڈیٹ دیا۔ پیپلزپارٹی دعوے نہیں کام کرتی ہے۔ پاکستان تحریک انصاف نے کراچی اور سندھ میں ایک ٹکے کا کام نہیں کیا۔ بلدیاتی انتخابات اور الیکشن کمیشن کے فیصلے پر اپنے ردعمل کا اظہار کرتے ہوئے ان کا کہنا تھا کہ کراچی اور حیدرآباد میں بلدیاتی الیکشن سے متعلق سندھ حکومت الیکشن کمیشن کے فیصلے کا جائزہ لے رہی ہے۔ کوئی بھی ایسا فیصلہ نہیں کریں گے جو آئین و قانون سے متصادم ہو۔ الیکشن کمیشن کی تحریری بیان کے بعد سندھ حکومت اپنا موقف پیش کرے گی۔ شرجیل میمن نے کہا کہ سندھ حکومت نے بلدیاتی الیکشن سے متعلق اپنا اختیار استعمال کیا۔ ہم الیکشن کمیشن کے فیصلے کا احترام کرتے ہیں۔ آرڈیننس لانے کے حوالے سے اطلاع نہیں۔ کچھ اختیارات عدالت، کچھ الیکشن کمیشن اور کچھ صوبائی حکومتوں کے پاس ہوتے ہیں۔ الیکشن کمیشن کے کسی دائرہ اختیار پر سوال نہیں اٹھا سکتے۔
ایک سوال کے جواب میں انہوں نے کہا کہ بلدیاتی الیکشن کی سیکیورٹی کے لئے فوج اور رینجرز معذرت کرچکی ہے۔ الیکشن میں فوج اور رینجرز کی تعیناتی وفاق کا اختیار ہے۔ پاک فوج ملک بھرمیں دہشت گردوں کےخلاف جاری آپریشن میں مصروف ہے، حساس پولنگ اسٹیشن پر سیکیورٹی کی تعیناتی کیلئے الیکشن کمیشن خود فوج سے رابطہ کرے۔ بلدیاتی الیکشن کیلئے 62 ہزار اہلکاروں کی ضرورت ہے، جبکہ تھریٹ الرٹ بھی موجود ہے۔ کچھ ہوگیا تو ذمہ داری کون لے گا؟
