پاکستان بزنس کونسل نے فوری طور پر درآمدی ایندھن کا استعمال کم کرنے اور ہفتے میں تین روز گھر سے کام کرنے کی تجویز دے دی۔ پاکستان بزنس کونسل کی جانب سے جاری بیان میں کہا گیا ہےکہ پاکستان کو فوری درآمدی ایندھن کا استعمال کم کرنا ہوگا۔ انٹرنیشنل انرجی ایجنسی کے10 نکات پر او ای سی ڈی ممالک عمل کررہے ہیں لہٰذا پاکستان کو بھی ان نکات پر عمل کرنا چاہیے۔ پاکستان بزنس کونسل نے تجویز دی ہےکہ جہاں ممکن ہو وہاں ہفتے میں 3 دن گھر سے کام کرنا چاہیے۔ ہائی ویز پر اسپیڈ کی حد 10 کلو میٹر گھنٹہ کم کرنی چاہیے اورملک کے بڑے شہروں میں اتوار کو گاڑیاں نہ چلائی جائیں۔ جبکہ پبلک ٹرانسپورٹ کے کرائے کم کئے جائیں۔ چھوٹے فاصلے پیدل یا سائیکل پرطے کیا جائے۔ کار شیئرنگ سے ایندھن کا استعمال کم کیا جاسکتا ہے۔ پاکستان بزنس کونسل نے تجویز دی ہےکہ بڑے شہروں میں متبادل گاڑیاں استعمال کی جائیں۔ مال بردار گاڑیوں کا مؤثر استعمال کیا جائے۔ جہاز کی جگہ تیز رفتار ریل رات میں استعمال کریں۔ الیکٹرک اور زیادہ پائیدار گاڑیوں کا استعمال کیا جائے جبکہ متبادل موجود ہونے کی صورت میں کاروباری سفری ضرورت کم کریں۔
