سابق کپتان اور وکٹ کیپر بیٹر سرفراز احمد نے ٹیسٹ میچز کی ففٹی مکمل کرلی۔ سرفراز احمد انگلینڈ کے خلاف ٹیسٹ سیریز میں قومی اسکواڈ کا حصہ تھے لیکن انہیں ایک بھی میچ میں نہیں کھلایا گیا۔ پہلے ٹیسٹ کے بعد سے ہی محمد رضوان کی بیٹنگ پرفارمنس پر سوال اٹھنا شروع ہوگئے تھے۔ سابق کرکٹرز کی جانب سے بھی یہ کہا جاتا رہا کہ رضوان کی جگہ سرفراز کو پلیئنگ الیون میں شامل کیا جائے لیکن ایسا نہ کیا گیا۔ نئی سلیکشن کمیٹی کے آنے کے بعد نیوزی لینڈ کے خلاف ٹیسٹ سیریز کے پہلے میچ میں محمد رضوان کی جگہ سرفراز احمد پلیئنگ الیون میں شامل ہوگئے۔ اس طرح کراچی میں جاری ٹیسٹ سرفراز کے کیرئیر کا 50 واں میچ بن گیا۔ سرفراز نے آخری میچ جنوری 2019 میں جنوبی افریقا کے خلاف جوہانسبرگ میں کھیلا تھا۔ وکٹ کیپر بیٹر نے 49 ٹیسٹ میچوں میں 3 سینچریوں اور 18 نصف سنچریوں کی مدد سے 2657 رنز بنائے ہیں۔
