کراچی میں شاہراہ فیصل پر بینک کا محافظ ہی ڈاکوؤں کا ساتھی نکلا جس نے بڑی رقم کی اطلاع دے کر 50 لاکھ روپے کی ڈکیتی کرادی۔ ایس ایس پی ایسٹ عبدالرحیم شیرازی کے مطابق رواں سال 16 نومبر کو شاہراہ فیصل پر ایف ٹی سی بلڈنگ میں واقع بینک سے نجی کمپنی کے مالک نے 51 لاکھ روپے نکلوائے تھے، وہ رقم لے کر پی ای سی ایچ ایس سوسائٹی بلاک 6 میں اپنے دفتر آئے تو 2 موٹر سائیکلوں پر سوار تین مسلح ملزمان نے انہیں یرغمال بنا کر رقم لوٹ کر فرار ہوگئے۔
ٹیپو سلطان پولیس نے مقدمہ درج کرکے تفتیش شروع کی، دوران تفتیش جدید ٹیکنالوجی کی مدد سے ملزمان کے برقی رابطوں کا سراغ لگایا گیا تو ایف ٹی سی بلڈنگ میں واقع اسی بینک کا سیکیورٹی سپروائزر خاور خان ڈاکوؤں کا رابطہ کار نکلا۔
پولیس کا کہناہےکہ شواہد ملنے پر سکیورٹی سپروائزر خاور خان کو گرفتار کیا گیا، ملزم نے دوران تفتیش انکشاف کیا کہ اس نے کمپنی مالک کے پاس بڑی رقم ہونے کی اطلاع اپنے ساتھی ملزمان کو دی تھی۔
ایس ایچ او ٹیپو سلطان عظمیٰ خان کے مطابق اس واردات کا مرکزی ملزم شاکر عرف شاہد ہے جو اپنے دیگر دو ساتھیوں کے ہمراہ بینک کے باہر موجود تھا اور سکیورٹی سپروائزر خاور خان کی کال پر رقم لے جانے والی گاڑی کا تعاقب شروع کیا، ملزمان نے بینک سے تعاقب کرکے واردات کی تھی۔
