سیلاب کی تباہ کاریوں کے باعث رواں مالی سال معاشی ترقی کا مقررہ ہدف حاصل نہیں ہوسکے گا۔ اسٹیٹ بینک کا کہنا ہے کہ مہنگائی کی شرح 20 فیصد سے زائد رہنے کا امکان ہے۔ اسٹیٹ بینک نے مالی سال 22-2021 کی سالانہ معاشی جائزہ رپورٹ جاری کردی۔ اسٹیٹ بینک کے مطابق سیلاب کی تباہ کاریاں اور انفراسٹرکچر کی تباہی معاشی ترقی کو شدید متاثر کرسکتی ہیں۔ معاشی ترقی کا ہدف حاصل نہیں ہوسکے گا۔ سبسڈیز کے خاتمے اورایندھن کے ٹیکس میں اضافے سےمہنگائی کا رجحان آئندہ بھی برقرار رہے گا۔ تاہم رواں مالی سال ٹیکس وصولیوں کے ساتھ نان ٹیکس آمدن میں اضافہ متوقع ہے۔ درآمدات میں کمی سے جاری کھاتے کا خسارہ جی ڈی پی کے 4.6 فیصد سے نیچے رہنے کا امکان ہے۔ آئی ایم ایف پروگرام بحالی کے بعد کثیر الجہتی اداروں سے بھی فنانسنگ کی توقع ہے۔ آئی ایم ایف پروگرام کی بحالی میں تاخیر اور سیاسی بے یقینی زر مبادلہ کے ذخائر میں کمی کا سبب بنے۔
