ملک بھر میں سردی کا راج برقرار، مری، گلیات اورآزاد کشمیرمیں برف باری

مری اور گلیات میں برفباری سے سیاح خوب لطف اندوزہورہے ہیں۔ قدرت کے دلفریب نظاروں کو دیکھنے کے لیے سیاحوں کارش لگا ہوا ہے۔ مری سے گلیات ایبٹ آباد آنے اور جانے والی سڑک بند ہے۔ آزادکشمیر میں باغ شہر اور مضافات میں شدید برفباری کا سلسلہ جاری ہے جب کہ ہٹیاں بالا اور حویلی کا زمینی رابطہ منقطع ہے۔

گلگت بلتستان کے ضلع استور، دیامر، اور چلاس میں پھر برفباری سے بالائی علاقوں میں مشکلات بڑھ گئیں۔ کوئٹہ، زیارت، ژوب اورقلات چمن ہائی وے پر برفباری سے اہم شاہراہوں پر ٹریفک کی روانی متاثرہے۔

دوسری جانب اسلام آباد میں رات گئے آندھی کے ساتھ بارش نے شہر کے موسم کو مزید سرد کردیا۔ کم سے کم درجہ حرارت 3 ڈگری سینٹی گریڈ ریکارڈ کیاگیا۔ کراچی سمیت سندھ کے دیگرشہروں میں بھی موسم سرد اورخشک ہے۔ کراچی میں کم سے کم درجہ حرارت 10 ڈگری سینٹی گریڈ رہا۔ لاہورمیں کم سے کم درجہ حرارت 8، مری میں منفی 1، پشاورمیں 8، گلگت میں منفی 1، اسکردومیں منفی 4 اوراستورمیں منفی 5 ڈگری سینٹی گریڈ ریکارڈ کیا گیا۔