ملک بھر میں آج یوم یکجہتی کشمیر قومی عزم و جذبے کے ساتھ منایا جا رہا ہے

کشمیر بنے گا پاکستان، پوری قوم یک زبان۔ پاکستان سمیت دنیا بھر میں آج یوم یکجہتی کشمیر منایا جارہا ہے۔ اسلام آباد میں دفترخارجہ سے یوم یکجہتی کشمیر ریلی نکالی گئی، سائرن بجا کرایک منٹ کی خاموشی اختیارکی گئی۔ کشمیر اور پاکستان کو ملانے والے تمام راستوں پر انسانی ہاتھوں کی زنجیر بنا کر یک جان دو قالب ہونے کا اظہار کیا جارہا ہے۔ آزادکشمیر کی قانون سازاسمبلی کاخصوصی اجلاس ہو گا جس سے وزیراعظم شہباز شریف خصوصی خطاب کریں گے۔

یوم یکجہتی کشمیرکے موقع پر اپنے خصوصی پیغام میں وزیراعظم شہباز شریف نے کہا کہ 75 سال سے بھارت نے کشمیر پر ناجائز قبضہ کر رکھا ہے۔ مقبوضہ کشمیرکی صورتحال اگست 2019 کے بھارتی غیرقانونی اقدامات کے بعد بدترین رخ اختیار کر چکی ہے۔ بھارتی اقدامات عالمی قوانین کی خلاف ورزی ہیں۔ شہبازشریف نے مزید کہا کہ کشمیریوں کے ساتھ کھڑے ہیں۔ بھارتی وحشیانہ اقدامات کو عالمی فورمز پر اجاگر کرتے رہیں گے۔

یوم یکجہتی کشمیر پر وزیرخارجہ بلاول بھٹوزرداری نے کشمیریوں کی جدوجہد کوسلام پیش کیا۔ اپنے بیان میں کشمیری عوام کی غیرمتزلزل اخلاقی، سفارتی اور سیاسی حمایت جاری رکھنے کے عزم کا اظہار کرتے ہوئے بلاول بھٹو نے کہا کہ جب تک کشمیری بھارتی مظالم کا شکار ہیں پاکستان چین سے نہیں بیٹھے گا۔