پاکستان کرکٹ بورڈ نے ایشین کرکٹ کونسل کے صدر اور بھارتی کرکٹ بورڈ کے سیکرٹری جے شاہ کے بیان پر باضابطہ ردعمل کا اظہارکیا ہے۔ ترجمان پی سی بی کے مطابق بورڈ کو صدر اے سی سی جے شاہ کے بیان پر حیرت اور مایوسی ہوئی ہے۔ یہ بیان اے سی سی بورڈ یا پی سی بی سے مشاورت کے بغیر دیا گیا ہے جس کے منفی اثرات مرتب ہوں گے۔ پی سی بی کے مطابق جے شاہ کا پاکستان سے ایونٹ منتقلی کا بیان یکطرفہ ہے، جوآئی سی سی اور اے سی سی کو تقسیم کرنے کے مترادف ہے۔ اس بیان سے 2023 میں بھارت میں شیڈول ورلڈکپ اور 2024 سے 2031 تک بھارت میں شیڈول آئی سی سی ایونٹس میں پاکستان کی شرکت پر اثرات مرتب ہوسکتے ہیں۔ پی سی بی ترجمان نے مزید کہا کہ جے شاہ کی صدارت میں منعقدہ اے سی سی اجلاس میں ایشیا کپ کی میزبانی پاکستان کے سپرد کی گئی تھی۔ اس اہم اورحساس معاملے پرایشین کرکٹ کونسل سے ہنگامی اجلاس بلانے کی درخواست کی ہے۔ ایشین کرکٹ کونسل کے صدرجے شاہ نے گزشتہ روز اعلان کیا تھا کہ 2023 کے ایشیا کپ کیلئے بھارتی ٹیم پاکستان نہیں جائے گی اورایونٹ نیوٹرل وینیو پر ہوگا۔
