ایک اور بھارتی بیٹر کی ون ڈے میں ڈبل سنچری

شبھمن گل ون ڈے کرکٹ میں ڈبل سنچری اسکور کرنے والے بھارت کے پانچویں بیٹر بن گئے۔ شبھمن نے یہ کارنامہ نیوزی لینڈ کیخلاف پہلے ون ڈے میں انجام دیا۔ بھارت کے شہر حیدرآباد میں نیوزی لینڈ کیخلاف میچ میں بھارت نے پہلے کھیلتے ہوئے 8 وکٹوں کے نقصان پر 349 رنز بنائے۔ ٹوٹل میں سے 208 رنز بھارتی بیٹر شبھمن گِل نے بنائے۔ انہوں نے اپنی اننگز کے دوران 149 گیندوں کا سامنا کیا اور 19 چوکے اور 9 چھکے لگائے۔

اس سے قبل جن کھلاڑیوں نے ون ڈے میچ میں ڈبل سنچری اسکور کی ان میں روہت شرما 264، مارٹن گپٹل 237 ناٹ آؤٹ، وریندر سہواگ 219، کرس گیل 215، فخر زمان 210 ناٹ آؤٹ، ایشان کشن 210، روہت شرما 209، روہت شرما 208 ناٹ آؤٹ، سچن ٹنڈولکر 200 ناٹ آؤٹ شامل ہیں۔
دنیا میں سب سے زیادہ 3 بار ڈبل سنچری بنانے والے کھلاڑی بھارت کے روہت شرما ہیں۔