ٹوئٹر کے مالک اور اسپیس ایکس کے بانی ایلون مسک نے ذاتی دولت کے سب سے بڑے نقصان کا عالمی ریکارڈ قائم کردیا۔ گنیز ورلڈ ریکارڈز کی ویب سائٹ کی ایک پوسٹ کے مطابق نومبر2021 سے دسمبر 2022 کے دوران ایلون مسک کی دولت میں 165 ارب ڈالر کی کمی واقع ہوئی ہے۔ یہ اعداد و شمار فوربز میگزین کے ڈیٹا سے لیے گئے ہیں تاہم گنیز کے مطابق چند دیگر حوالوں کے مطابق ایلون مسک کو ہونے والا نقصان اس سے بھی زیادہ ہو سکتا ہے۔
ایلون مسک نے گزشتہ برس جب ٹوئٹر خریدا تھا تو ان کی الیکٹرک گاڑیوں کی کمپنی ٹیسلا کے شیئرز میں گراوٹ دیکھی گئی تھی کیونکہ 44 ارب ڈالر میں ٹوئٹر خریدنے کے بعد سرمایہ کاروں کو خدشہ ہے کہ وہ ٹیسلا کو اتنی توجہ نہیں دے پا رہے۔ اس سے قبل ذاتی دولت میں سب سے بڑے نقصان کا ریکارڈ 2000 میں جاپانی ٹیکنالوجی سرمایہ کار مسایوشی سون کے پاس تھا جنھیں 58.6 ارب ڈالر کا نقصان ہوا تھا۔
ایلون مسک دسمبر میں دنیا کے امیر ترین شخص کی اپنی حیثیت سے اس وقت ہاتھ دھو بیٹھے جب ان کی جگہ فرانسیسی لگژری اشیا کی کمپنی لوئی ووٹون کے چیف ایگزیکٹیو برنارڈ آرنلٹ نے لے لی تھی۔ فوربز کے مطابق ایلون مسک کی دولت اب 178 ارب ڈالر ہے جبکہ برنارڈ آرنلٹ کی دولت کا اندازہ 188 ارب ڈالر تک لگایا جا رہا ہے۔
