امریکا کی اسٹینفورڈ یونیورسٹی کے سائنسدانوں نے بتایا کہ صدیوں سے یہ جاننے کی کوشش کی جا رہی تھی کہ اسٹار فش کا سر کہاں ہوتا ہے اور اب یہ معمہ حل ہوگیا ہے۔ اس راز کو جاننے میں اتنا عرصہ اس لیے لگا کیونکہ یہ جاندار بہت زیادہ مختلف ہے۔ مختلف جاندار جیسے کیڑے اور پرندوں کا جسمانی تناسب ایسا ہوتا ہے کہ سائنسدانوں کو سر، پر، ہاتھ، پیر یا دیگر اعضا کے مقامات شناخت کرنے میں مشکل نہیں ہوتی۔ مگر اسٹار فش کے 5 ہاتھ ہیں اور اسی وجہ سے اس کے سر کی شناخت کرنے میں صدیاں لگ گئیں۔ محققین کے مطابق اس تحقیق میں جدید ٹیکنالوجی کی مدد سے اسٹار فش کے ہر ہاتھ کے مختلف جینز کا تجزیہ کیا گیا۔ اس وقت محققین کا خیال تھا کہ کچھ جینز سر سے مشابہت رکھتے ہوں گے جبکہ کچھ دیگر اعضا سے منسلک ہوں گے، مگر انہیں ہر جگہ زیادہ تر سر جیسے جینز ہی ملے۔ محققین کے مطابق یہ دریافت بہت حیران کن اور غیر متوقع تھی۔ اب سائنسدانوں کی جانب سے یہ جاننے کی کوشش کی جائے گی کہ کیا اسٹار فش میں ایک سے زیادہ دماغ بھی ہوتے ہیں؟
