سیکرٹری پیٹرولیم نے قومی اسمبلی کی قائمہ کمیٹی برائے پیٹرولیم کو بتایا ہے کہ اس بار سردی میں گیس صرف کھانا پکانےکے اوقات میں 8 گھنٹے ملےگی۔
اجلاس میں بریفنگ دیتے ہوئے ایم ڈی سوئی سدرن نے بتایا کہ سردیوں کے لیےگیس لوڈ منیجمنٹ پلان پیٹرولیم ڈویژن کو جمع کرادیا ہے، گھریلو صارفین کو گیس ترجیحی بنیادوں پر ملےگی، سردیوں میں کیپٹو پلانٹس کی گیس کاٹ دی جائےگی۔
سوئی گیس کمپنیوں نےگیس کی قیمتوں میں237 فیصد تک اضافہ مانگ لیا
ایم ڈی سوئی سدرن کا کہنا تھا کہ کراچی میں لیاری کیماڑی کے نواحی علاقوں میں گیس کی کمی کے مسائل ہوسکتے ہیں، سردیوں میں گیس کا 20 سے 30 کروڑ مکعب فٹ یومیہ قلت کا تخمینہ ہے۔
سیکرٹری پیٹرولیم نے بتایا کہ ہمارے پاس گیس ہے ہی نہیں، ملک میں گیس کے ذخائر ختم ہو رہے ہیں، اگرصورت حال یہی رہی تو 10 سال بعد مقامی گیس بھی ختم ہوجائےگی۔
سیکرٹری پیٹرولیم کا کہنا تھا کہ دنیا کی بڑی کمپنیاں پاکستان آنے کے بجائے دوسرے ممالک جارہی ہیں، عالمی کمپنیاں تیل وگیس کی تلاش کے لیے کم رسک ممالک میں جا رہی ہیں، عالمی کمپنیاں سیاسی عدم استحکام کے باعث پاکستان نہیں آرہی ہیں۔
