محکمہ موسمیات نے شہر میں سردی کی نئی شدید لہر اور درجہ حرارت 3 ڈگری سینٹی گریڈ تک جانے کی پیشگوئی کی ہے۔
موسمیاتی تجزیہ کاروں کا کہنا ہے کہ مغربی ہواؤں کا سسٹم بلوچستان پر اثر انداز ہے جس کے باعث کراچی کا مطلع جزوی ابر آلود رہنے کے ساتھ بوندا باندی بھی ہوسکتی ہے۔ جب کہ سسٹم کے زیر اثر دوپہر سے کراچی میں تیزگرد آلود اور سرد ہوائیں چلنے کا امکان ہے، اس دوران ہواؤں کی رفتار 30 سے 40 کلو میٹر فی گھنٹہ ہوسکتی ہے جب کہ گرد آلود ہواؤں کے باعث فضائی معیار بھی متاثر رہے گا۔ مغربی ہواؤں کا سسٹم ملک سے نکلنے کے بعد سردی کی لہر بڑھ سکتی ہے، کراچی میں سردی کی نئی لہر پچھلی لہر سے شدید ہوسکتی ہے جس سے شہر کے مضافات میں درجہ حرارت 3 سے 5 ڈگری سینٹی گریڈ تک آسکتا ہے۔
محکمہ موسمیات کے مطابق 23 یا 24 جنوری سے درجہ حرارت میں کمی کا امکان ہے۔
