نیپال طیارہ حادثہ: خاتون پائلٹ کے شوہر بھی اسی ائیر لائن کے حادثے میں ہلاک ہوئے

اتوار کو نیپال میں گرنے والے یٹی ائیرلائنز کے طیارے میں 72 افراد ہلاک ہوئے جن میں جہاز کی معاون پائلٹ انجوکھاتیواڈا بھی شامل ہیں۔ غیر ملکی خبر رساں ایجنسی کے مطابق طیارے کی معاون پائلٹ کے شوہر جو خود بھی پائلٹ تھے، 16 سال قبل 2006 میں اسی ائیر لائن کے حادثے میں ہلاک ہوگئے تھے۔

ائیر لائن کمپنی کے ترجمان نے تصدیق کی کہ خاتون پائلٹ انجو کھاٹیوڑا نے 16 سال قبل اپنے شوہر پائلٹ دیپک پوکھرل کی فضائی حادثے میں موت کے بعد ملنے والی انشورنس کی رقم سے جہاز اُڑانے کی تربیت حاصل کی تھی۔ انجو نے 2010 میں یٹی ائیرلائنز میں شمولیت اختیار کی، اتوار کے روز تباہ ہونے والے طیارے میں انجو بطور معاون پائلٹ موجود تھیں اور ان کے انسٹرکٹر ان کے ہمراہ تھے۔

طیارہ حادثے میں ہلاک ہونے والے 72 مسافروں میں سے اب تک 68 افراد کی لاشیں نکال لی گئی ہیں جب کہ خاتون پائلٹ کی لاش اب تک نہیں مل سکی۔ حادثہ نیپال کے پوکھرا انٹرنیشنل ائیرپورٹ پر کھٹمنڈو سے آنے والے طیارے کو لینڈنگ کے وقت پیش آیا جس کی وجہ تاحال معلوم نہیں ہوسکی۔