بانی پاکستان قائد اعظم محمد علی جناح کا یوم پیدائش آج منایا جارہا ہے

برصغیر کے مسلمانوں کو پاکستان کی صورت میں ایک آزاد وطن دینے والے بانی پاکستان قائداعظم محمد علی جناح کی 146 ویں سالگرہ ملک بھرمیں عقیدت واحترام کے ساتھ آج منائی جارہی ہے۔ 25 دسمبر 1876 کو کراچی کے وزیر مینشن میں محمد علی جناح نے آنکھ کھولی تو کون جانتا تھا کہ یہ بچہ عظیم رہنما بن کربرصغیر کے مسلمانوں کی کشتی پار لگانے میں اہم کردار ادا کرے گا۔ 1895 میں انہوں نے لندن سے قانون کی ڈگری حاصل کی اور بمبئی واپس آکر باقاعدہ طور پر وکالت کا آغاز کیا۔ 1896 میں محمد علی جناح نے سیاسی زندگی کا آغاز کرتے ہوئے انڈین نیشنل کانگریس میں باقاعدہ شمولیت اختیار کرلی لیکن کچھ عرصے بعد ہی انہیں احساس ہوا کہ کانگریس صرف ہندوؤں کی نمائندہ جماعت ہے۔ 1913 میں انہوں نے آل انڈیا مسلم لیگ میں شمولیت اختیار کی اورعلیحدہ وطن کی باقاعدہ تحریک کا آغاز کیا۔ قائد اعظم نے اپنے شب و روز مسلمانوں کے سیاسی شعور کی بیداری کیلئے وقف کر دیے۔ بالآخر ان کی جدوجہد رنگ لائی اور 14 اگست 1947 کو برصغیر کے مسلمانوں کا علیحدہ وطن کا خواب پورا ہوا جس کا نام پاکستان رکھا گیا۔ آج کے دن ملک کے سرکاری اور نجی اداروں میں بابائے قوم کے پیغام کو اجاگر کرنے کیلئے تقاریب، سیمینار اور کانفرنسز کا انعقاد کیا جارہا ہے۔ قائد اعظم محمد علی جناح کے رہنما اصولوں، اتحاد، تنظیم اور ایمان پر عمل کرکے ہی ملک کامیابی کی جانب بڑھ سکتاہے۔