الیکشن کمیشن نے سندھ حکومت کی کراچی اور حیدرآباد میں بلدیاتی انتخابات ملتوی کرنے کی درخواست مسترد کرتے ہوئے الیکشن 15 جنوری کو ہی کروانے کا فیصلہ کیا ہے۔ الیکشن کمیشن کا ہنگامی اجلاس چیف الیکشن کمشنر سکندر سلطان راجہ کی زیرصدارت ہوا جس میں سندھ حکومت کی درخواست اورنوٹیفکیشنز پرغور کیا گیا۔ سندھ حکومت نے کراچی ڈویژن، حیدرآباد اور دادو ضلع کی دو تحصیلوں میں 15 جنوری 2023 کوہونے والے بلدیاتی انتخابات ملتوی کرنے کی درخواست کی۔ الیکشن کمیشن نے قانونی اور آئینی تقاضوں کو مدنظر رکھتے ہوئے صوبائی حکومت کی بلدیاتی انتخابات ملتوی کرنے کی درخواست نامنظور کرتے ہوئے کراچی، حیدرآباد اور دیگر اضلاع میں انتخابات شیڈول کے مطابق 15 جنوری کو کرانے کا حکم دیا۔
الیکشن کمیشن نے وزارت داخلہ کو انتخابات کے دوران انتہائی حساس پولنگ اسٹیشنوں پر فوج یا رینجرز کی تعیناتی کو یقینی بنانے کی بھی ہدایت کی۔ اجلاس میں کہا گیا کہ وفاقی حکومت ہو یا صوبائی حکومتیں کوئی بھی بلدیاتی انتخاب کرانا نہیں چاہتا۔ اسلام آباد میں بلدیاتی قانون میں ترمیم کا سارا ملبہ الیکشن کمیشن پر ڈالا گیا۔ سندھ میں بلدیاتی انتخابات کے تمام انتظامات مکمل تھے دودن پہلےعین وقت پر سندھ حکومت نے ایسا اقدام کیا۔
